曾經講過唔鍾意企喺藝人後面表演嘅江熚生（Anson Kong），一直嘅夢想就係做歌手，更想有一日能夠奪得叱咤男新人金獎，回想當年曾經簽咗一間公司，可惜冇發展嘅機會，最終要解約收場，由於Anson好鍾意唱歌跳舞，但佢自知暫時未可以靠唱歌維生，所以只好選擇做舞蹈員。

26歲嘅Anson做咗舞蹈員近2年，有次無意中發現ViuTV選秀節目《Good Night Show全民造星》，於是決定搏一搏，畀自己一個機會，經過重重難關，Anson殺入最後10強，又靚仔又跳得嘅佢唔單止同姜濤成為頂頭大熱，而且仲有好多囡囡fans，係囡囡殺手，而《造星》主持黃心美，更加冧爆Anson，每次見到Anson表演都發晒癲。

日前Anson喺九龍灣接受《蘋果》專訪，問到佢依家有咁多支持者，有冇一種吐氣揚眉嘅感覺？Anson話：「有呀，最開心係我阿媽，以前我阿媽睇騷，唔係睇歌手唱歌，佢係咁搵我喺邊，依家媽咪每日都睇重播，好誇張㗎，例如嗰集啱啱播完，佢就即刻重睇番前一集。」

一直以嚟，Anson為咗比賽好努力排練，但喺選出10強嘅時候，導師劉美君竟然指佢雖然唔夠進步，但因為佢靚仔、能夠駕馭舞台，所以無論如何都推佢上去，Anson又點睇呢個評價？

佢諗咗一諗，然後話：「我覺得自己有啲唔爭氣，進步係唔夠大，我想嚟緊嘅日子，啲人睇到我唔係靠樣，我係可以有實力咁行落去，我知道自己喺呢幾個月，學習進度唔算快，因為我本身唔算係好有天份嘅人，大家以為我好有自信，其實我以前唔係咁樣，我係唔識跳舞，完全唔識唱歌，五音不全，我單純到只係我想做，我想試，我想將呢樣嘢成為我嘅職業，所以中學同學成日話我發明星夢，因為佢哋印象中嘅我，識鬼唱歌咩，但我性格係你越抨擊我，我越要做畀你睇，其實我花咗7年時間先練到依家呢個Level，仲要唔係好勁。」

Anson自知唱歌唔夠好，所以佢希望喺唱歌方面有所改進：「唱歌、跳舞、做戲，我最想做就係歌手，劉美君老師話我懶音好勁，我係需要改善呢個問題。」

Anson指如果將來正式出道，佢唔怕被外界批評佢唔夠班：「由比賽開始到依家，我都慣咗呢啲抨擊，開頭係有介意，最差係話我屋企人，粗言穢語，嗰啲係我最接受唔到，最唔開心，依家望到都有啲火滾，如果你抨擊我身型、樣，我冇乜所謂，自己咪做好啲囉，我唔鍾意人哋話我屋企人。」

外界大多都認為姜濤會贏，Anson就希望有五十五十嘅贏面。會唔會視姜濤為勁敵？Anson話：「我當佢係小朋友、細佬，講真，我哋咁多個人嘅關係都好好，如果真係佢攞，証明佢值得，因為呢個比賽係會公開投票，雖敗猶榮，到最後如果係姜濤，大家都會（拍手掌），大家喺呢3個月嘅關係同經歷，其實比起100萬同第一名更重要，我哋更加展望將來喺行內碰面，依家大家乜都冇，就已經建立咗關係，贏咗班兄弟。」

覺唔覺得自己靚仔﹖係咪被好多女仔追﹖現時單身嘅Anson笑住話：「OK啦，又唔覺得自己好靚仔，我唔多女仔追㗎，讀中學嘅時候，女仔幾討厭我，因為我有少少包包面，把口又好賤，畢業之後，因為鍾意跳舞而開始收身，個人就正路啲，所以中學同事都話我唔同咗。」

有指ViuTV會簽Anson Kong為旗下藝人，經理人合約為期5年，不過Anson似乎有所考慮：「我未簽，我唔知電視係咪一個好適合我發展嘅地方，因為我最想係唱歌，我有個夢想，好想攞一次叱咤男新人金獎，所以我想簽唱片公司多啲。」聽聞ViuTV將安排Anson拍景黛音有份主演嘅新劇，Anson攤開雙手：「點解我唔知嘅﹖拍劇係咪一定要簽約先﹖如果淨係搵我拍劇，我一定OK。」

採訪：黃曉妍
攝影：陳俊強
攝錄：廖達燊

精選娛聞，喺晒《娛果》
http://fb.com/appledailyent