今個月30號，溫碧霞(Irene)踏入50歲，若非溫小姐本人一直冇刻意隱瞒真實年齡，你會以為眼前受訪者，似係一位70後甚至80後。

訪問期間，繼續短裙露招牌膊頭嘅溫碧霞，說話時聲調陰柔，對兩邊頭髮嘅擺位頗為執着，無論影相或做訪問，都會不自覺輕撥秀髮。見微知著，溫碧霞絕對係一個唯美主義者。

誠然，以Irene現時要腰有腰、要胸有胸嘅身形，絕對carry到身上所着嘅低胸迷你裙，凍齡美魔女亦絕非浪得虛名。

已婚育有一子(丈夫何祖光、養子Xavier)嘅Irene，今次再出嚟宣傳，係為新劇《三一如三》做宣傳，已有16年冇喺香港拍劇嘅Irene，未公佈幫ViuTV拍劇前，坊間一直打賭佢今次復出，十之八九會返娘家，結果出乎意料，跌到一地眼鏡碎。Irene話：「其實有同無綫傾過吓，睇過劇本，但好似唔係咁啱囉！咁多年冇遇過一啲啱嘅story，我之前喺無綫拍嘅，雖然只有幾部，但我真係好鍾意先會拍，好似第一套劇就拍《火玫瑰》，之後《封神榜》嘅妲己，每個角色自己印象都好深，不過拍完妲己後，好似冇遇過一啲比較有challenge嘅角色，唔拍係想留啲好嘅memories俾觀眾！」

大台量度有幾高，唔少人都領教過，不過Irene就話唔太擔心：「得失無綫？都唔會嘅，因為咁多年關係都好好，我有份拍嘅無綫劇，咁多年喺國內都不斷咁重播，我都好多謝TVB俾咗咁多經典角色我做。其實幫邊個電視台拍劇都冇乜所謂，最主要真係好耐冇喺香港拍劇，咁啱《三一如三》個故事又幾得意！」

50歲，對一般人嚟講，已走過人生一大半，對一個女藝人嚟講，係一個重要心理關口，而對一直做開花旦嘅溫碧霞，反而係一個解脫。佢話：「其實target做幾耐？都有諗過，總之我唔會係嗰種甘草演員，做多幾年我唔會再做，一定唔會做到老，或者俾自己5至7年時間，之後我想去外國讀書，因為我鍾意art，鍾意畫畫，因為我由細到大讀書唔多，細個入行咁多年都冇停過，所以想去外國過啲好簡單嘅生活。最緊要留個memories俾觀眾，咁就夠啦，我就心滿意足可以退出。」