【本報訊】膠粒災難發生至今逾一個月，但本港多個偏遠地區的海灘仍滿佈膠粒。綠色力量總幹事文志森表示，大嶼山、芝麻灣半島等附近的海灘，膠災仍然嚴峻。他形容，現時才是膠災最艱難時刻，「政府嘅外判工人唔會去到呢啲咁偏遠嘅地方，加上膠粒已經埋喺沙堆中，要動員好多人、時間先可以完全清理完」。

繼續組織市民長期作戰

過去一個多月，本港的環保團體都組團執膠，綠色力量過去兩日聯同逾200名義工到大嶼山拾塱、牛牯灣等偏遠沙灘清理膠粒。文志森表示，現場仍有大量膠粒未清理，「呢啲地方唔可以直接去到，冇碼頭要坐駁艇或者行一個鐘，最嚴重係膠粒已經埋喺沙堆中，好花時間分開」。他估計，仍需要約一至兩個月才可以徹底清理散落在各海灘的膠粒，未來的周六、日都會繼續組織市民長期作戰。政府跨部門繼續清理在颱風後散落在海灘、海上及養魚區的膠粒，截至昨午4時，當局清理近100公斤膠粒。食物安全中心也檢驗20條海魚，結果沒有驗出膠粒。而漁護署今日收到養魚戶通報，在長沙灣魚類養殖區發現少量塑膠粒，已經清理。