當年今日
關於我們

【年度差餉】良心業主冇狂加租 佐敦街坊餅店努力守業

蘋果日報 2019/03/18 08:20

好鄰居餅店高鐵星餐廳黎永佳西九龍站良心業主戲曲中心高鐵柯士甸站加租小店佐敦文蔚街燒味

「3蚊一個蛋撻、3個半一個菠蘿包,咁多年冇乜點加價,做開街坊生意。」好鄰居餅店在佐敦文蔚街開業超過30年,老闆陳先生94年接手經營,每日朝6晚8,一做就25年,見證區內變遷。「當時呢度係碼頭,人比較多啲。嗰時工廠年代,(工人)菠蘿包、雞尾包成盤買走,一盤盤咁買,以前好多人,條街好旺㗎。」
300多呎的餅店,是附近街坊、學生的聚腳地,「買完麵包,佢哋得閒會傾多兩句,打吓牙骹。」感情一點一滴累積,與街坊由客人變成朋友,「有啲由細睇到佢大,睇住佢細個孭住個書包幫我買麵包,結咗婚、搬走咗就拖住小朋友返嚟幫襯。」
西九龍一帶多年來大興土木,繼柯士甸站,再有高鐵西九龍站,不少業主看好旅客會帶來商機,「由起柯士甸站開通前已經炒到飛起(加租),(部份業主)咪係咁加價,有啲加成倍、有啲加百分之五十,好多(租客)被加得太厲害都唔做,家吓都冇乜幾間剩低,大部份都因為加租走咗。家吓都有好多吉舖,有啲空咗年幾、兩年。」
餅店幸好遇上良心業主,「啱啱續租業主無乜點加租,(良心業主)家下都好難搵」。他又稱,高鐵西九龍站通車後,文蔚街一帶人流沒有增加,「(旅客)去都去咗尖沙嘴、寶靈街、佐敦道……嚟唔到呢度,因為呢度冇商場,啲人唔會嚟呢度買嘢。」他又稱,該處「多咗一、兩間藥房,我諗大部份人都係睇好(高鐵通車),但無諗過係冇人流。」
小店努力守業,也有餐廳擺明做高鐵旅客生意,主力賣港式燒味,更取名高鐵星。高鐵星餐廳去年初開業,高鐵通車前,首8個月要蝕本,生意淡靜到周日要關門休息。不過,高鐵至今通車半年,負責人黎永佳稱,受惠附近的酒店,餐廳生意已好轉,比初時生意額增加約兩成,「呢邊有賓館、酒店(旅客)都會嚟呢度食嘢,人流多番啲,加上戲曲中心睇戲啲人,入場前食咗嘢先去戲曲中心,多咗呢啲客,同埋戲曲中心有員工,佢哋都會嚟呢邊食飯。」
他又稱,人流主要集中在中午時段,「周五、周六都比較多遊客,大節日好似國慶、黃金周,農曆新年都多人嚟」。他更笑言,「幾乎日日都有遊客問我哋邊度有藥房,如果呢度開間藥房,我保證佢有生意。」
記者 譚靜雯
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef
empty
高鐵星餐廳去年初開業,高鐵通車前,首8個月要蝕本,生意淡靜到周日要關門休息。不過,高鐵至今通車半年,負責人黎永佳稱,受惠附近的酒店,餐廳生意已好轉,比初時生意額增加約兩成。王心義攝
empty
王心義攝