四川雅安地震發生，明星「愛心捐獻」——捐去邊同捐幾多忽然成為討論熱點。捐得少仲會招來批評。站在道德高地批評，但對災民水深火熱之痛，又有多了解呢？

眾內地藝人當中，除咗李連杰嘅壹基金，同韓紅出錢又出力之外，腳傷未完全康復嘅黃曉明，先後捐出30萬，並呼籲道：「懇請網民、慈善機構告知怎樣才能最快將這筆錢變成救災物資，第一時間送到前線」。

噚日黃曉明仲撐著兩支枴仗，去四川省人民醫院，探望因為雅安地震、左腿需截肢嘅12歲男孩黃謀，並捐咗10萬俾佢哋，希望孩子們能盡快走出地震帶來嘅陰霾。

除咗探望傷者，黃曉明仲去咗探大熊貓，並於微博寫道：「今天去震后的雅安。親手餵了只還在上幼兒園的熊貓寶寶，看著這些小傢伙真的能夠讓人忘卻疲勞和煩惱。」相中，黃曉明同佢喺08年汶川大地震後領養嘅熊貓雙胞胎:「平平」、「安安」排排坐，又餵佢哋食竹，好溫馨呢。