周秀娜今日喺尖沙咀出席中國移動舉辦嘅精品APP交流會，呢個交流會同娜姐有咩關係？因為中國3D數碼老闆蕭定一套戲《千億惡魔愛上我》出咗個手機遊戲，娜姐係女主角囉！

娜姐今日玩露背長裙，佢話自己都會喪玩手機遊戲，不過0依家就唔會玩到唔瞓覺。問佢會唔會同人玩？娜姐話：「如果喺屋企，都想有個人一齊玩。」咁有無對象？佢自嘲呢排無乜電力。宅男們，機會嚟啦！

至於電影《千億惡魔愛上你》就未開拍，娜姐話要等男主角張智霖（Chilam）有期，自己手上都有劇本睇緊。講到前度Avis（陳偉成）同女友Yumi（尹蓁晞）分咗手，娜姐話：「哎呀，我唔知呀，無乜留意，分開咗都冇聯絡。」

Yumi話Avis係冇內涵嘅男人？娜姐即刻劃清界線：「呢啲係兩個人嘅感情事，我完全係外人，曾經都過咗好耐啦。」咁以前拍拖覺唔覺得Avis有內涵？佢話：「咁我覺得大家都會成長，真係唔關我事。」講完仲大笑添。

咁Yumi仲話唔想講太多，因為唔想畀Avis博宣傳？娜姐說：「我唔係當局人，知嘅嘢都係你哋報道，我只係想講一句，君子絕交不惡於色。」

咁覺唔覺得好可惜？佢話冇乜感覺，仲話：「我會祝福大家，係我都祝福自己先，不過而家都幾享受單身。」

咁有無翻撻可能？娜姐就話無諗。將來伴侶係咪要有內涵呢？佢話：「我想成熟過自己，係女仔都想搵個男朋友錫你嘅，緣份嚟嘅。」