當年今日
關於我們

【李八方online】胡志偉踩車踩到忘晒形

蘋果日報 2015/09/14 06:00

單車胡志偉比賽李八方ONLINE忘形

民主黨立法會議員胡志偉出名係單車發燒友,平時出入立法會,不時以單車代步。八方聽聞佢最近報名參加咗旅發局舉辦,喺下月11日舉行嘅香港單車節35公里挑戰組,參加者喺啱啱過去嘅星期六接受技術測試,包括要喺15分鐘內完成20個圈。

有在場人士向八方報料,話胡志偉簡直係超額完成,15分鐘內唔知踩多幾個圈,之後要求16秒完成窄路掉頭,對佢呢位單車友嚟講,一樣無難度,難怪在場其他單車友都讚佢勁。

八方問過胡志偉,佢笑笑口話,忘形踩車時,真係唔知自己15分鐘踩咗幾多圈噃,但好似超過同組接受測試嘅人4、5個圈,估計踩咗24、25個圈啩!佢話係自己留意到有呢個活動後主動報名,強調自己一向有操練開,唔使特登加操。