當年今日
關於我們

日圓貶值5類至扺日本貨

蘋果日報 2002/01/04 00:00


自上星期日圓貶值至132日圓兌1美元後,深受日本文化影響的香港,可謂滿城風雨、議論紛紛。日圓貶值對香港經濟有多大影響,現在還是言之尚早。不過對於好多專賣日本水貨的零售行業、日本料理及旅遊業,肯定有相當衝擊。對普羅大眾而言,最關心當然係現時日本貨究竟平咗幾多。原來當中五大類消費品,已作出即時反應。

記者:周靜飴 攝影:周靜飴、楊錦文 模特兒:Celina
第一位
水貨私家車勁減兩萬
自上星期日圓跌至3年來最低點,專營日本水貨車的車行即時減低車價,減幅有5至8%,實行跟足日圓嘅跌幅,以吸納更多顧客,結果生意不跌反升。以這款Estima八人房車為例,減咗大約2萬元,最近想買車或換車嘅朋友,重等乜嘢?而這次乘勢的宣傳已為他們的生意額帶來十幾個巴仙的升幅。在這個市道低迷的環境,日圓下跌可謂為他們帶來額外得益。
先蝕後賺谷銷量
富利堡車行負責人黃小姐話:
「我哋做大減價是減先前入貨的車,所以日圓下跌,加上大減價,我哋暫時未有實際利潤增長。因為就算我哋𠵱家由日本訂貨,批貨最快要兩個月才到港,所以成本在兩個月後才真正下調。不過我哋希望可以因日圓繼續下跌而先蝕後賺。」
第二位
水貨AV及電器即時打八折
買開水貨AV或家電嘅朋友,對於Yen價升跌特別敏感,所以呢類舖頭喺日圓下跌後立即有反應,售價即跌7%至20%,約為數百至數千元不等。最顯著嘅例子係呢部東芝34吋34D9UXH大電視,由原本$14,800跌至$11,800,狂減3千元,唔貪新款嘅你,絕對買得過。
第三位
日本料理入貨平 魚生勁跌6成
頻頻由日本空運新鮮材料到港嘅日式食肆,日圓下跌對他們的成本最快有影響,入貨成本即刻低咗約10%,加上𠵱家市道差,好多食肆都推出減價魚生,乘勢吸引顧客。價錢即時減咗2至6成,非常抵食。
郎田日本料理李師傅:
「我哋一星期幾次從日本空運新鮮材料到港,所以啲魚生名副其實海鮮價,跌得好快,我哋希望借今次日圓下跌推出特價魚生,吸引顧客,寧願賺少啲,薄利多銷。」
第四位
水貨化妝用品下調3成
同水貨私家車一樣,有專賣水貨化妝用品的舖頭順勢減價,以吸引更多人消費,減幅為10%至30%,不過一般水貨化妝品和用具的售價只係幾百元,因此減價後慳嘅錢唔係最多。呢個假期水貨舖的生意額亦因減價升咗2至3成,可見減價已成為喺香港生存嘅必然招數。
日本水貨化妝品店主Kelvin:
「我哋一向以賣日本水貨為主,早已習慣了日圓的升跌,日圓升跌對我哋們影響不大,日圓下跌,我哋嘅售價會跟住平啲。不過今年市道仍然唔多好,所以乘住日圓下跌個勢,做吓減價,希望催谷更多人消費。」
第五位
日本旅行團團費平1成
由於日圓下跌,旅行社訂酒店的成本下跌,團費亦跟住下調,去日本各處的團費平均平咗幾百元至千多元不等。另外,為了吸引一些專誠去日本購物的旅客,日本本州的購物團亦相應減了5至10%。日本眾多旅行團中,以去北海道的5天團最為抵玩,旅費由去年約$6,400減至$5,700,比去年同期平了約20%。事實上喺在日圓貶值後的這個星期內,報名去日本的人大幅升兩成,益晒旅行社。
本州購物最受歡迎
據學聯旅遊發言人周先生:
「呢排多咗好多人嚟報日本團,除咗因為撞啱就嚟農曆新年假期外,日圓貶值亦令到多咗人去日本掃貨,所以報本州購物團的人都大幅上升了。」
潮流貨冇人吼生意急跌3成
日圓貶值,唔係個個老闆都有得益,好似專賣日本潮流貨嘅「私物店」,自從日圓下跌後,生意額跌咗3成。睇嚟日圓下跌令到本來已經好低迷嘅潮流零售業雪上加霜。不過由於潮流水貨舖的貨品種類少,所以好難做減價,只係某些滯銷嘅波鞋才會減得較大的幅度。
店主阿凡:
「好多人諗住日圓跌就去日本掃貨,尤其為潮流物品如衣物、波鞋等,嗰邊啲貨始終齊好多。呢排啲人入到嚟直情當我哋舖頭係Showroom,喺呢度睇啱都忍手唔買住,等過到日本先至買,好多行家都因為咁生意大跌,我哋賣潮流嘢嘅真係唔希望日圓跌。」
雜誌CD企硬價
唔好以為日圓下跌就逢日貨必減,一些日本較平價的貨品如CD、VCD、DVD和雜誌就冇乜影響,CD和DVD最多平十元八塊,消費者冇乜實際得益。加上911事件後,好多賣呢類貨品嘅水貨舖早已減價救市,今次日圓下跌,其實已經冇乜下調空間。
售賣點:

富利堡汽車中心(28776700)
地址:灣仔告士打道128號信誼大廈地下D舖

華仁會(23914430)
地址:旺角洗衣街81號地下

康泰旅行社(29286060)

郎田日本料理(28110213)
地址:鰂魚涌海灣街13-15號地下

合作社化粧品(23328631)
地址:旺角登打士街56號家樂商場地下G51舖

私物店(23144788)
地址:尖沙嘴山林道46-48號運通商場1樓25,30,31號舖