雖然個市已經上番接近12000點水平，成交額亦有成120幾億，不過點睇個市都唔似長升長有，尤其係花旗股市見到10000點就調頭走。有朋友就話今次個市既然無乜散戶揸貨，班大戶就索性挾到你唔信，然後先施施然咁離場。
不過依伏勝嘅睇法，就算個市要升到去13000點，要班散戶落叠相信都幾難，皆因好多散戶已經唔係咁易入市，加埋呢一排啲股仔唔理個市點行都有番咁上下成交額，所以個市變咗大戶有大戶玩，散戶有散戶玩，今次班大戶推郁咗個市之後，要喺班散戶身上搵錢都幾難。

光通數網傳有搞作
好多三四線股仔都開始升到咁上下，根據股場嘅「潮水流向理論」嚟睇，都應該係時候睇番啲比較落後嘅仙士股。呢排市場上面好多隻股仔都話有料到，不過好多隻都重係只聞樓梯響，其中啱啱換咗老闆嘅光通數網（155）就好似話有新搞作。

伏勝有位朋友話佢哋嗰邊間行幾睇好隻股仔，雖然過去嘅表現唔多好，不過新老闆都幾肯落本，淨係4月份已經喺市場增持咗成億幾股，加埋佢手上有多隻王牌，大多數人都預咗佢會唧啲資產入去，只係爭在睇吓點樣出牌先可以做到多方勝出嘅局面。不過講明呢類股仔都係好大波動，有冇得執都要睇你有幾大膽識。
講吓講吓，澳門個賭牌會喺今個禮拜正式簽署，早前以爆大冷跑出嘅呂先生，好似重未決定點去安置所持有嘅股份。市面上已經有人同佢計身家，話佢手上所持嘅娛樂公司股份，市值起碼有24億，如果真係擺咗落去嘉華系是旦一間公司，個價實炒到飛天，所以市場又話要炒番嗰系股，大家不妨留意吓173同埋27號仔。
伏勝