巴黎聖日耳門（PSG）嘅尼馬波衫過去30日總共賣出咗12萬件，總值超過780萬鎊（約8,300萬港元），銷情誇張到PSG方面甚至擔心可能會隨時冇貨。

25歲嘅巴西球星尼馬，上個月以破世界紀錄轉會費由巴塞隆拿轉會PSG，正式加盟之後佢嘅PSG波衫單日賣出超過10,000件，而佢喺球場上亦表現出色，幫PSG踢咗五場比賽射入咗五球同助攻一次，波衫喺過去30日更狂賣12萬件，球會官方商店嘅營業額畀舊年同期大幅上升咗75%，相信亦都係因為尼馬加盟而帶動。英國《每日郵報》報道，PSG嘅尼馬波衫原本係預備賣到11月，宜家咁好賣可能喺11月返貨之前會冇晒貨。