呢兩日傳得好勁，話皇家馬德里中場占士洛迪古斯（J.Rod）今夏過檔曼聯，仲話雙方會喺嚟緊星期日宣佈，而J.Rod更加喺周二缺陣操練。不過，喺皇馬嘅賽前記者會上，教練施丹就話：「J.Rod喺呢度，呢個唔係問題，佢同我哋喺一齊。佢今日（周二）冇操，只係撞傷咗，但J.Rod一直同我哋一齊，我哋腦入面只係諗住季尾剩番嘅三場比賽。」

除咗J.Rod外，有傳艾華路莫拉達唔滿意施丹，喺上場對西維爾嗰陣拒絕同施丹握手，施丹就話：「莫拉達唔係嬲我，佢係嬲第啲嘢，我唔知係咩嚟啦。我哋已經傾過，冇事發生。」皇馬周三出戰聯賽作客切爾達，施丹話會當呢場同埋下場聯賽對馬拉加係盃賽決賽咁踢。家陣皇馬同巴塞隆拿一樣得87分，雖然巴塞對賽成績較好排榜首，但皇馬踢少一場。