卜蜂（043）有頭一季靚仔成績單打底，加埋內地飛天豬價，集團內地豬飼料接力，今年成績單應該keep住靚仔，預測PE又係內地行家當中最平，有得諗。
卜蜂啱啱派今年頭一季成績單，盈利增長咗16%，到近5億元（港元·下同）。呢季度，越南養殖呢瓣增長，仍然係最靚仔。仲要咁睇，國家統計局啱啱公佈無耐，4月份豬肉價格，同比升咗33.5%。豬價猛升，刺激番低迷咗好耐嘅養殖業，而農戶補欄，對卜蜂豬飼料亦帶嚟直接需求，卜蜂呢一瓣內地業務，有機turnaround。

由泰國首富掌舵

又卜蜂新加內地食品加工，喺啱啱第一季，呢一瓣開始為集團帶嚟收入貢獻。而隨住呢瓣發力，又為卜蜂開多條新米路。再講，卜蜂掌舵人謝國民，係泰國首富，而成個母系，兼喺農牧食品瓣數，搞得有聲有色，卜蜂有呢個背景優勢，俾母系湊到肥肥白白，唔難。
唔扯咁遠，睇硬數據，好保守計數，卜蜂今年EPS keep住15%增長，到9.5仙，現價0.81元預測8.5倍PE。又食住飛天豬價，內地行家金新農（深：002548），由2月到家陣，短短三個月累升90%，今年預測37倍PE、大北農（深：002385）同期亦升咗近30%，預測29倍PE、唐人神（深：002567）28.5倍PE。卜蜂預測PE，比內地行家平咗近70%！
呢轉煲卜蜂，當今年預測PE，上番本身過去5年平均12倍PE計數，卜蜂都講緊要升40%，到1.14元，目標價預測PE，係未有耐追到上內地行家。

錢雋
細價股專家
本欄逢周一、三、五刊出