做過地鐵主席，𠵱家做緊電盈副主席嘅打工皇帝蘇澤光（JackSo），絕少公開分享自己多年來嘅工作經驗。不過，為咗母校香港大學，噚日就破天荒以「以文學院畢業生為榮」作題，喺港大陸佑堂演講，講述自己多年喺不同崗位嘅經驗同難忘事，其中地鐵同埋電盈嘅經歷，講得比較少，最特別嘅係八達通個中文名原來係由JackSo改嘅。

掌寮仔部印象難忘
蘇澤光話，一畢業投身社會，就加入政府八年，最難忘係掌管寮仔部同加入當時新成立嘅廉政公署。當時佢要喺清拆寮屋嗰日帶領一批主任，同死纏爛打、要求增加補償嘅居民周旋，重要拆除現場所有建築物。喺嗰三年，好多時要面對暴力場面，就算有警察護送，都要有堅定信心同勇氣先得。
至於喺ICAC工作時，就因為社會上好多人認為ICAC不近人情、違反社會正常慣例，令自己變得不受歡迎，「朋友對我嘅態度變得冷淡，冇人約我食飯，親戚問我點解要做呢啲蠢事」。都咪話唔慘。