內地演員胡兵近年轉戰美國、日本發展,唔聲唔聲竟然做咗日本「網絡紅人」,早前胡兵參加日本綜藝節目《北野武的電視撞擊》,介紹自己喺北京嘅豪宅,睇唔出佢咁肯畀錢打扮,只係衫同飾物就價值約2億人仔(約2.4億港元),更揚言去日本消費10萬元人仔嘅中國遊客都係窮人,即被網民圍插佢「炫富」。
胡兵疑發「炫富」論,引起咁大迴響,前日胡兵即喺微博發長文,聲稱自己參加嗰個日本節目錄製嘅初衷,同後期呈現嘅形式有被「曲解」嘅成份,本意只係想向日本人展示「中國年輕的一代如何通過自己的努力實現富足生活」嘅一面,被當作「炫富」係斷章取義。
據內地報道指,該日本節目中更節錄一啲普通中國遊客去日本大量搶購日貨嘅片段,節目組仲打出「可是有一個人說,這些都是中國的窮人」嘅字幕,跟手字幕再次出現「那麼真正的有錢人胡兵是怎麼生活的?」,鏡頭就跳到去胡兵居住720平方米、市價為10億日元(約6425萬元港元)嘅豪宅,鏡頭中先見胡兵嘅400平方米起居室、再打出8千萬日元(約514萬元港元)裝修等字眼,再寫胡兵花費2300萬日元(約148萬元港元)建立運動室,仲有各種名牌手袋、鞋、服裝、鑽石等,總值可以買下4個公寓嘅衣帽間,節目播出後,唔少日本藝人同觀眾都被嚇倒,更被內地網友熱烈討論。
胡兵之後喺微博寫長文澄清炫富一事,佢寫道:「節目組希望來北京做一期特輯,關於中國年輕一代如何通過自身努力實現富足生活,希望拍我家和我的朋友們。我覺得是好事,於是邀請了節目組來到我位於國貿住了十年的家拍攝,並非傳說中的霄雲路8號。所有你們看到的我家的估值以及裝潢和收藏估值,都是節目後期添加的估價,我並沒有給出過任何具體金額。」
至於講到胡兵有名牌首飾,胡兵就解釋表示:「攝影師展示自己吃飯的傢伙;單反、鏡頭、影棚,大家應該會誇他敬崗愛業吧?我在時尚圈、影視圈努力工作二十多年,每一件添置的衣服褲子鞋都是我工作上的好夥伴,都是一點一滴積累的結果,而設計珠寶和收藏手錶也是我多年來唯一任性的興趣愛好。這和普通的炫富並不一樣吧。」
胡兵更坦言當時佢接受該節目訪問時,「在節目中不說日語,堅決使用中文……可惜的是,包括我和我朋友們談到中國年輕一代通過努力實現自身價值等很多優質素材最後都沒有被使用」,而有精通日語嘅網友更指,胡兵喺節目稱「這些都不是真正中國的有錢人,中國的有錢人都不是這樣生活的」,而唔係諷刺「這些都算是窮人」,胡兵更指佢只係想向日本觀眾介紹中國年輕人奮鬥嘅現狀,但可能冇考慮到後期製作,仲有網路傳播帶來嘅後果,胡兵亦指對於被「剪輯」一事,已投訴日本電視台,電視台將開會解決。
其實,近年不少內地旅客走去日本瘋狂搶購日貨,若大家去日本旅行,可能隨時見到唔少「中國大媽」喺電器舖血拼,甚至有傳寫上「madeinChina」喺日本出售嘅廁所板都被買晒,難怪「炫富論」一出,令日本網民咁大反應?