長和系主席李嘉誠最近接連計劃出售百佳、分拆港燈等本港資產，積極向海外發展嘅訊息非常明確，甚至捐錢做善事，超人都要同外國機構合作，新近李嘉誠基金會就捐出10.14億元，同以色列理工學院合作，喺汕頭大學旁興建新學院「廣東以色列理工學院」。

超人同以色列好有淵源，早年投資以色列電訊公司Partner，賣掉大賺一筆；旗下創投基金2011年注資以色列流動地圖服務商Waze，今年中獲Google以百億元收購，再賺一筆。
超人喺新聞稿都話，基金會2011年首度訪問以色列理工學院，校長之後來港回訪，促成超人投資喺Waze，基金會賣Waze股權賺到嘅錢，部份已經捐番畀以色列理工學院作為今次捐款嘅部份款項。
超人好重視呢次捐款，親身去到以色列台拉維夫簽署合作備忘錄，創辦新學院。除咗基金會，廣東省同汕頭市政府將撥款9億人仔同提供一塊土地，支持新校建設。
新校將於明年開辦土木與環境工程和電腦科學學士課程，仲會聯合汕大推行以大數據為基礎嘅生命科技研究，啱晒超人近年專門投資科技嘅口味。
超人成日話基金會係佢第三個仔，捐錢冇手軟。佢對上一次，捐10億元，又鬧得熱烘烘嘅，應該就係佢2005年捐10億元畀港大醫學院，醫學院之後變成李嘉誠醫學院嗰次嘞。

李華華
mailto:[email protected]

死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24