「徐仔」徐子見區選成功「斬樹除根」，擊敗民記東區區議員「Tree根」鍾樹根後，最近同義工舉行慶功會，席間更高歌一曲，但就唔係網民慶祝佢成功「斬根」時所唱嘅小鳳姐名曲《喜氣洋洋》，而係關正傑嘅《一點燭光》！

呢首歌原來對徐仔好有意思，因為佢喺11月嘅誓師大會上，喺父母同太太支持打氣下，都曾經唱過呢首歌，更獲得全場掌聲。徐仔當選後相當勤力，據知已積極搵緊辦事處，近日亦頻頻落區，試過兩粒鐘派咗過千張單張，向市民講解「網絡廿三條」通過後，市民生活會受到乜嘢影響，佢仲預告，聽日會去參加反對「網絡廿三條」嘅集會。