【夫妻合葬】霍震霆父母明天重聚 四代同堂伴最後一程
蘋果日報 2020/09/14 00:09
霍震霆霍英東霍呂燕妮霍啟剛郭晶晶
已故全國政協副主席霍英東正室霍呂燕妮，本月1號在養和醫院病逝，享年97歲，霍家後人今日在北角香港殯儀館為霍老夫人設靈。霍震霆於晚上近9點，偕3子啟剛、啟山、啟人、媳婦郭晶晶、孫兒中曦，以及霍震寰和太太陳琪琪、兒子啟文，一同離開殯儀館。啟剛和郭晶晶帶住囝囝上車時向傳媒說：「辛苦晒大家！」獨留下霍震霆接受傳媒訪問，他語氣平靜地說：「有少少依依不捨，佢都支持咗我父親半世紀，照顧我哋兒孫。點講都100歲，最後一段全家人陪伴住佢，都係簡單儀式，大家都懷念佢。」問到媽咪是否和先父合葬？霍震霆續說：「係呀！呢個都係佢想嘅，聽日會喺天上見父親，特別兒孫都喺度，我哋好感恩得到佢照顧。中國嚟講，佢97+3都100歲，又四代同堂，大家最後一段時間喺度陪佢。我好多謝佢嘅照顧，聽日佢會同父親一齊。」
霍震霆透露檢閱媽媽的舊照時，勾起不少回憶：「原來佢有好多舊相，睇返我哋啲點滴，我哋做過乜嘢喺後面寫好晒，睇返啲畢業相，對我哋屋企照顧好好。有段時間，我哋去晒外國讀書，都好多時關心我哋。我父親都忙咗半世紀，有佢照顧，一齊過聖誕嗰啲都有，回顧返幾十年，我代表子孫多謝佢一路照顧。」他並謂長孫中曦非常乖巧：「頭先都有摺衣紙，最早嗰時佢探太嫲，都有同佢做exercise，每次探佢都好有心，我解釋畀佢聽嫲嫲離開我哋，佢都接受。」
霍啟剛和太太郭晶晶、大仔中曦上車離開。（蘋果日報）
霍家子孫輩晚上近9點一同離開。（蘋果日報）
霍震寰，太太陳琪琪及啟文緊隨其後。（蘋果日報）
霍震霆表示父母將同合葬於柴灣香港佛教墳場。（蘋果日報）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！