這天（3日）雷神開鑼直落連贏五場後，第六場四班1400米終於見到第二個騎師贏馬，炒飯哥羅理雅策徐雨石馬房「好友益」後上一擊即中，成功幫自己在復出首日贏馬攞威，該駒則係連續第二季首戰即勝，今場單Win及組合獨贏A2分別派94.5及27.5元。

羅理雅受上季4月17日在田草騎「飛鶯」（已斷腳人道毀滅）墮馬膊頭受傷影響，過去四個半月一直休養冇出過賽，今午於開鑼日復出首戰，跑到第四場曾以「開心日子」上名得季軍。

卒之在太太欄邊落力打氣下，炒飯哥在第六場展示炒飯絕技，夥拍五歲馬「好友益」沿途守七八位，末段狂鞭殺上，反壓前置馬原本勝利在望的「飛越峰」爆出半冷門，險勝短馬頭位，亦帶挈羅理雅自己連續第二季開鑼贏馬。

第六場二至四名順序為「飛越峰」、「勝利專家」及「鑽飾傳奇」，分別配祈普敦、貝湯美及史卓豐，四重彩就由呢四位戶籍都在澳洲的年輕騎師包辦，每注派一萬九千幾。三T有人中正獎，每注派彩超過2,014萬之多。