33歲日本男星小出惠介被雜誌《Friday》公開性醜聞，所屬嘅Amuse事務所即安排小出無限期停工，不僅已被代言廣告提前解約，就連有份參演嘅妻夫木聰新片《愚行錄》都受牽連被迫提早落畫。事件拖累Amuse股價下跌，估計需賠約3億日圓（折合2,121萬港元）違約金，目前事件涉及強姦或列為刑事案處理，如果罪成嘅話，最高刑罰要判監兩年及罰款100萬日圓（約7萬港元），有傳媒指小出將會開記招親自向外界道歉。

在報道出街後，唔少日本藝人都乘機抽水，紛紛出來受訪指小出有酒後亂性前科。其實小出成名後已傳過多宗緋聞，演出經典日劇《交響情人夢》時已撻着紗榮子，之後再戀上另一拍檔水川朝美，更在四年前搭上44歲影后宮澤理惠，被爆鍾情未成年少女之餘亦相當雜食。至於《東京Sports》就訪問一名同小出發展一夜情嘅水着偶像，對方大爆小出性癖，發現小出上床時有鋪英文癮，會不停大嗌：「Oh...」、「Yeah...」、「Comin'!!」等等。