華將今日原本表現麻麻，跑到第十場為止，只得黎海榮一人於第三場憑「踏雪無痕」入過凱旋門。尾場一班千六米，卒之開番條華將Q，楊明綸接手方廐「旅遊大哥」，淨跑拉士百幾米，恃住磅輕後發先至，以勁勢超越一度走甩之李嘉欣愛駒「貳寶」，爆11倍綠燈win，馬兒首次在港報捷，一洗「旅遊」系多駒之前連場搏失，包括「旅遊仁義」勝後被告甩之頹風；「旅遊大哥」馬主兼康泰旅行社創辦人黃士心，賽後親自拉頭馬，笑到見牙唔見眼。
「旅遊大哥」上季來港養喺摩廐，身價唔平，跑落卻無突破，今季轉投方廐，前仗二班千六米輸畀「勝飛」做二奶，呢場升高一班，用楊明綸減兩磅輕上加輕，留前鬥後卒之搞掂，反為大摩想以「貳寶」殺叛將卻被反誅，屈居亞軍，後駒鞍上人梁家俊已騎到一絕，落敗亦無話可說。
今場第三名是杜利萊騎之「火紅人」，第四名乃上個月過大海贏澳港盃之「夢仙」。