前日辭去深圳控股（604）執行董事同首席營運官職務嘅張化橋，重操故業，重返投資銀行瑞銀打工。瑞銀噚日宣佈，委任張化橋為中國區副總經理，下個禮拜一29號正式返工。張化橋06年離開瑞銀，過檔深控，家陣全球金融界立立亂，多家投資銀行缺水嗌晒救命，喺咁嘅時勢，張化橋選擇重返娘家瑞銀效力，唔通有危先有機？張生果然膽識過人。

有「民企之父」美譽

張化橋素有「民企之父」美譽，佢過檔深控前係瑞銀金牌分析員，曾經多次獲選《亞洲貨幣雜誌》嘅中國最佳分析員，臨走前做到瑞銀證券董事總經理兼中國研究部聯席主管。佢最經典之作就係睇淡歐亞農業同科龍（921），結果兩家公司相繼出事，歐亞農業仲除埋牌㖭。
張化橋喺深控主席胡愛民三顧草廬力邀下，06年3月過檔呢間老牌紅籌公司。張化橋出任首席營運官期間，重整公司業務，手起刀落出售非核心業務，專心發展大陸房地產同基建。喺張化橋改革下，深控股價節節上升，喺舊年大牛市，股價一度飆升至7.98蚊，同佢加盟時1蚊股價相比，足足急升超過六倍。不過，家吓全球股市大冧市，深控股價大幅回落，噚日收報1.35蚊。