當年今日
關於我們

雯女冇份玩台慶話: 好正常,我冇約o架啦

蘋果日報 2013/12/06 06:00


電影《四大名捕2》噚晚舉行首映,黃秋生、鄭中基同埋好耐冇見嘅鄧萃雯都有出席,有份客串演出嘅雯女,喺台上話今次係因為秋生先接呢套戲。

事後訪問雯女,佢話呢次戲份唔多,今次內容比較多男人戲,所以唔駛打,亦唔會有肉搏戰。雯女話:「今時今日搵男演員對手唔容易,因為我嘅氣場好勁,好容易俾人覺得女勁過男,不過今次同秋生合作,有佢鎮壓住,所以我可以做一個俾佢扶持嘅小女人。」唔知現實生活又想唔想有呢類男人出現呢?雯女話:「梗係想喇,邊度有女人鍾意咁強o架?乜都孭上身咁辛苦,我將夢想投射喺戲裡面。」

同無綫關係麻麻嘅雯女,自爆話同無綫冇晒合約,所以佢好享受自由身,既然冇約,自然今年台慶頒獎禮梗係冇份玩,佢話:「好正常喎,我冇約o架啦,唔會再出鏡。」唔通真係同合約兼得罪高層有關?佢就話:「你哋唔同再問呢啲喇,我只係覺得件事冇話公唔公平,係正常體制,係人之常情,好正常。」佢亦都唔認自己喺微博既留言有弦外之音:「我都唔會發生乜事,只可以答冇回應,我成日都講呢啲嘢喇,嗰啲應該係福音嚟o架!」黃秋生亦大讚雯女係一個好女人,講到會唔會戥佢可惜,到依家都未有另一半,秋生話:「佢話俾你聽冇咩?」仲笑話可以介紹劉青雲俾佢做朋友。