高盛集團公布第四季業績勁賺31.5億美元，升咗差唔多一倍。高盛員工今年嘅花紅好和味，除開每個人都有五百萬，最勁嘅會有一億美元！咁香港員工呢？華華聽聞有人攞咗200個月嘅花紅！200個月即係16年零8個月，仲長過楊過等小龍女。呢位人兄打破咗幾年前高盛有人攞咗80幾個月花紅嘅傳聞紀錄。
雖然高盛一直被譽為全球投資銀行一哥，但係睇番高盛盤數，收入最勁嘅其實喺炒房兼投資部門；第二就係資產管理同埋證券部；最尾係投資銀行部。
高盛今年喺香港先後幫咗5間公司上市，總共集資咗千幾億元，當中以中國銀行（3988）集資額最大，在市場集資980億元，佔咗差唔多八成半。

作為包銷商同埋賬簿管理人，高盛每次都有佣金收。以香港公開發售的佣金比例嚟講，約係集資額嘅2.5%。雖然只有建滔積層板係高盛獨力負責，其他新股都要孖住其他人做，若果以集資總額1000億計，2.5%就有25億，高盛佔番15億都唔算過份，啲員工花紅梗係和味啦！
仲有高盛喺香港市場嘅投資最叻肯定係工商銀行（1398）。工行上市前，高盛用咗200億買咗164.76億股工行。喺高盛公布嘅業績入面，工行呢個投資幫高盛足足賺咗差唔多10億美金。如果以噚日工行收市價4.13元計，賬面賺咗足足495億，問你服未！
[email protected]