著名財經專欄作家曹仁超早前話大市見底，港股真係升唔停，今日仲有機會挑戰23000點。由傳媒人變芬佬嘅曹Sir唔敢認晒叻，旗下基金公司原來有請分析員幫手，曹Sir早排就俾一位來自大行嘅分析員激親，事關對方開價年薪400萬元，曹Sir不禁狂呻：「我做傳媒幾十年，去到高層級，都冇呢個價啦！」

呢位分析員要求人工200萬，另加花紅200萬，曹Sir話，好多分析員喺大行拎慣呢個價，即使知道唔係個別例子，都嚇一跳，根本請唔起，「畀400萬你，即係你至少應該幫我搵返幾千萬，但我又唔認為可以喎。」
佢順便勸喺大行工作嘅後生仔，指股市過咗最黃金嘅時間，佢好懷疑，再過幾年，呢行係咪叫到呢啲價，係時候面對現實了。