長實本月高價投得何文田地王,估唔到帶挈埋附近窩打老道八號(窩八)業主。
窩八早排險些淪為「英雄塚」,因為何文田地皮有價,即刻升值。一眾乘今年三月樓市大升浪,買入該盤單位嘅業主,𠵱家竟然有幸賺錢離場,算係執番身彩。
例如二座五百幾呎中層C單位,業主三月以二百餘萬買入,一度「坐艇」。上月該盤臨近入伙,有二百幾個二手單位放盤,但買家寥寥可數,業主徘徊蝕讓邊緣。
幸而賣地後氣氛大好,近日遇上投資者,以二百二十八萬接貨,每呎三千九,唔使蝕,重有微利。
創世紀獨立賞景𨋢
山頂創世紀歷史悠久,業主個個身份顯赫,○一年由世茂中國以兩億三買入,特別保留咗「股壇怪傑」香植球住過嘅主樓「玻璃屋」,只喺側邊起咗兩幢獨立屋,命名施勳道21號。
無敵海景一向係山頂豪宅最大賣點,世茂中國地產部經理黃志偉話,獨立屋嘅建築設計,令到花園、泳池、車房、廳房,全部都可以望到海景,每幢洋房重特設私家觀光𨋢,住客就連上上落落,都可以望到海景。
蘭西記得,深水灣香島道33號都有私家𨋢,不過,同時集觀光用途於一身嘅私家𨋢,呎個盤都係第一次。施勳道21號絕對唔會嘥咗個靚景。