本地銀行加息，一加就係半厘，似乎唔合「慎重漸進」嘅格林斯潘語錄。幾個月之前，美國加息，香港似若無其事，懶懶閒，因為大銀行水浸，散戶儲蓄存款多的是，畀零點幾厘息，優惠利率就五厘，大銀行直情賺到笑。使乜加息呀？故此美國加息，自己都費事郁。但冇咁多散戶存款，靠定期存款與同業拆息嘅銀行，因利率容易變動，就比較心急嘞，呢類銀行嘅利息支出，今年上半年隨時比去年上半年增加幾成，你話盤數點計呀？

金管局見到銀行唔加息，直頭唔安樂，因為聯繫滙率機制不能郁，要維持掛鈎，港元利息一定要緊跟美國。於是金管局諗出任三招，暫時趕走啲熱錢，逼銀行諗辦法。於是渣打扯頭，搵埋東亞、星展等一齊率先加息。滙豐、恒生、中銀三大行有個款，唔肯跟，之不過，美國又加咯噃，三大行諗咗好耐，唯滙豐馬首是瞻，一加就係半厘，意圖追番上次冇加到嘅幅度，但係渣打、東亞驚執輸，追住加半厘。聽講八月美國再次加息之時（多數加四分一厘），滙豐仍會加半厘，等優惠利率去到六厘七五，而到時其他銀行可能識做，只係加四分一厘，於是令到香港唔會有兩個不同嘅優惠利率喎。
銀行家忙完加息，望住泰興集團就頭痛，要撇帳十六億，苦過弟弟，不排除有銀行貸款主管起身，以示問責。借錢畀呢類家族管理嘅上市工業股最麻煩，貸款主管不能當佢係有規模、有管治嘅上市公司睇，要當番佢係未上市嘅所謂middlemarket公司處理，淨係睇年報表達嗰盤數，分分鐘瓜咗水都未天光。心水清之退休賓架Ｂ同左丁山講：「曾經有某銀行附屬嘅證券公司推薦過泰興，目標價近八蚊。但係呢間銀行嘅貸款部就好嘢噃，出事前不斷追收貸款，你話幾醒目呢？」