34歲嘅戚黛黛今年五月嘅時候，同拍拖3年幾，細佢兩年嘅副機師男友楊智龍(Calvin)喺峇里訂婚，噚晚香港時間10時左右，佢哋就喺意大利一個小城嘅古堡舉行浪漫嘅意國婚禮。

黛黛喺圈中嘅一班姊妹曹敏莉、朱凱婷、陳茵媺、李施嬅，還有張紫櫻(車車)，之前有出席佢嘅過大禮儀式，但圈中嘅姊妹團就只有朱凱婷同車車能夠親到意大利，出席黛黛嘅婚禮。

喺意大利時間下午二時(香港時間13號晚上8時)，準新娘黛黛同準新郎Calvin先到達古堡拍攝結婚相，而一班姊妹同兄弟團喺現場作最後嘅準備。至意大利時間下午五時(即香港時間晚上11時)，大約八十名親朋好友，由世界各地（香港、加拿大、英國、美國、法國、日本…好犀利喎……）一同見證黛黛同Calvin嘅大日子！到達嗰時，曾經落微微雨，但天公造美，行禮嗰時太陽就出番嚟！

婚禮上，證婚人仲講咗個好感動嘅故仔，叫佢哋要互相愛對方，話無論結咗婚幾年，都要當自己係一個Lover咁樣，keep住愛火；雖然黛黛同Calvin好感動，不過都忍住唔喊。之後一對新人宣誓同交換戒指，好開心好甜蜜！

好姊妹朱凱婷透過電話接受《蘋果》訪問時就話，黛黛同老公Calvin全程都好開心，好high，仲話Calvin表現得好活潑，係一個「好得意嘅男仔」；交換完戒指，拋完花球，影晒相之後，一對新人就準備party同晚餐，跟住黛黛同Calvin就會跳First Dance，黛黛仲同爸爸跳舞。

朱凱婷又話，黛黛爹哋同親戚都帶晒結他等樂器，夜晚會係佢哋嘅band performance，應該都會玩得夜，表示黛黛多謝大家嘅祝福。