陳秋霞戰勝癌魔（新聞連結： http://bit.ly/2vRoZu8 ），主診醫生係姨甥女鄺靄慧，其歌手弟鄺祖德大讚阿姨勇敢，鄺祖德接受《蘋果》電話訪問表示：「佢做體檢發現，即刻搵專科，搵我家姐，始終都係自己人，佢心情一路都冇任何唔開心，反而好正面，可能及早搵到醫生，好多嘢都安心，佢好勇於同屋企人、朋友share情況。」

問到阿姨接受治療過程係咪好辛苦？鄺祖德透露：「每人做化療反應唔同，佢身體冇乜副作用，只係甩頭髮，冇瘦過，胃口非常好，甩頭髮最唔開心係我阿媽，見到佢都喊，反而阿姨冇任何唔開心，好正面去醫，留喺香港3個月，3個女輪流嚟香港陪佢，姨丈都有飛過嚟，因為佢都好忙，中間阿姨都有返去見姨丈。阿姨係非一般堅強，患病嘅人可能好低落，但佢完全冇呢種心情，就算做化療都冇乜嘢唔舒服，好似一個正常人，我哋反而好擔心佢，叫佢唔好出咁多街食飯，但佢完全冇嘢，做足戴口罩防備措施，好硬淨，非常之勁，完全一點滴灰心都冇。」

鄺祖德指阿姨已康復，目前已回吉隆坡：「佢o依家努力做慈善工作，又飛大陸、台灣、香港做書法上交流，keep住好忙，亦非常之健康，好似冇病過咁。唯一擔心fans見到佢唔開心，但佢好想話畀fans知：『我冇事！病唔使擔心，勇於對抗。』因為佢本身多灰白髮，o依家豁出去，呢個係佢新形象。」