戴夢夢同男友朱翰博（Ricky）喺尖沙嘴拍拖買篋，仲俾《蘋果》讀者「爆相爆片」見到兩人有商有量咁好好傾，嚟緊就聖誕節，揀個新篋拍拖去旅行都好正路吖。

《蘋果》日前打過俾夢夢，不過佢就否認買篋係為咗拍拖：「之前同老闆（「大少」林建名）去咗西班牙，我哋去咗酒莊玩，呢排好忙，咁啱有篋贊助，我當日就順便去拎篋返屋企。」夢夢又堅持，會將私人感情低調處理。

夢夢仲騷咗一啲同老闆林建名去西班牙個trip嘅靚相，見佢好似細路女咁傍實林建名，同行仲有張達明，佢哋一齊去酒莊嘆紅酒爽到爆，夢夢話：「林生玩得好開心，今次主要去酒莊，有個廣州隱世廚神同我哋一齊去拍嘢，達明做主持，林生行街時，仲畀人認錯以為佢係一星大廚。酒莊莊主安排咗鬥牛師傅嚟，仲做咗件鬥牛勇士衫畀林生，佢換咗好鍾意，仲一齊當場跳鬥牛舞。」