由李安導演執導嘅新片《色，戒》，經過5個月嘅後期製作，亞洲區預告片聽日會喺全球網絡首播，雖然外界將注意力集中喺梁朝偉身上，但其實李安對第二男主角王力宏同埋女主角湯唯都要求好高，早喺開拍之前，王力宏同湯唯仲要接受訓練，先可以演繹出上世紀抗戰時期革命青年同女特務嘅味道。
內地新演員湯唯飾演嘅王佳芝，係一個清純嘅大學生，王力宏飾演嘅鄺裕民係革命進步青年，故事講述佢哋同一班學生組成秘密組織，目的係暗殺偉仔飾演嘅易先生，湯唯仲不惜施展美人計，用自己嘅身體換取偉仔條命。

演活王佳芝

片中湯唯由女學生變成情婦，同偉仔嘅感情搞到糾纏不清，所以角色心境不停變化，湯唯為咗完美演繹，事前接受半年嘅密集式地獄訓練，由着旗袍、高跟鞋以至談吐、儀態、動靜，同埋學習上海人嘅說話口音，全部都一絲不苟，結果令李安大跌眼鏡，曾經講過喺現實生活中要搵真正嘅王佳芝係唔可能嘅李安都要推翻自己嘅講法，話「湯唯讓王佳芝活了過來」。
至於左撇仔王力宏，為配合角色要練習用右手寫書法，同時又跟李安邀請嘅兩位台北藝術大學戲劇教授學習肢體課程，王力宏話之前自己唱過饒舌歌，背過好長嘅歌詞，估唔到因為咁而幫咗佢，要背更長嘅對白都冇問題喎。