韓國男團VIXX隊長N今日由大阪單拖飛嚟香港，出席下晝於大埔舉行嘅活動。大約中午12時24分左右，戴上黑超、穿上白恤衫、西褲配涼鞋嘅N終於抵達香港，佢一現身即被廿幾名粉絲包圍。粉絲大叫「oppa」，更有人向N遞上檸檬茶。表現親民嘅N有停低畀傳媒影相，沿途亦有笑笑口，搭lift去停車場時，N亦有向傳媒及粉絲揮手，之後上車離開。

N下晝3時就現身大埔超級城出席活動及舉行簽名會，吸引近300粉絲撐場。會上N跟粉絲大玩遊戲，又送抱又餵食麵包，更親自教女粉絲射箭，又大唱王力宏嘅《KissGoodbye》。

N表示今次來港最想食點心同飲珍珠奶茶，不過之前已來過香港幾次，美食同觀光都做過，今次比較想喺香港濕平。而N最近開始挑戰作曲填詞，之後都想多來香港宣傳。