羅志祥（小豬）噚日喺台北西門町同粉絲見面，舉辦演唱會DVD《極限拼圖》預購簽售會，戶外氣溫高達37.8度，現場粉絲都熱到爆汗，但為睹小豬風采，依然等得好開心。

而小豬喺台上好體恤歌迷話：「絕對不會再在夏天發專輯！」為免歌迷中暑，小豬更自掏腰包，租咗8部工業用嘅電扇，後來追加到20部，現場仲安排咗巨型冰牆為大家解暑，等粉絲可以降溫，小豬話：「感謝大家，希望大家身體健康，不要中暑。」

小豬已經4次蟬聯專輯銷售排行榜冠軍，但今年應趕唔到推出新專輯，所以希望以呢張DVD力拼5連霸。講到信心如何時？小豬講笑咁話：「已經拿下5連霸了，因為現在是咳嗽第一名！感冒1個多月還沒好。」