亞視藝人袁潔儀專程由廣州抵港支持葉家寶，今早更陪同好友家寶到沙田裁判法院。袁潔儀在訪問中表示：「因為咁多年，無論係前輩後輩，無論係上司下屬，同埋朋友關係，無論係咩關係，我覺得係值得過嚟撐下，呢幾日，我先生有啲國內朋友嚟香港玩，因為之前去玩嘅時候，佢哋都有招呼過我哋，禮貌上應該全程跟住佢哋，不過，我老公好好，佢話當然要撐咗葉生(葉家寶)先，我老公冇見過家寶，佢都好支持。」袁潔儀仲話老公叫自己盡量唔使趕，不過，袁潔儀笑言老公其實唔係好熟香港，佢都係烏下烏下，但佢老公就堅稱手機發達冇問題。

問及亞視係唔係未發9月糧，袁潔儀坦認：「9月個糧係未出嘅，但係我對公司係好有信心，希望逐步逐步慢慢嚟，因為新嘅老闆都有啲，譬如遞畀政府嘅文件嗰啲，都有啲林林總總嘅程序要做，但係逐步逐步嚟講，希望慢慢縮短嗰個拖糧嘅日期，以前係一個禮拜，希望佢逐步逐步可以五日、四日、三日，正如學佢話齋，未來一、兩個月都可以運作正常，會準時出糧，因為咁大間公司，同埋佢國內資金有時有啲困住，譬如有啲國內假期好似十一黃金周，我哋其實香港係放一日，不過，國內好多時放七、八日連埋啲中秋假期，新疆有啲朋友仲放成兩個禮拜，希望亞視員工明白到新老闆主要都係國內，程序接洽可能唔係太脗合。」

袁潔儀又指，自己容忍到公司出糧會拖幾日，又稱要逐步慢慢來，要運作一間公司要有一個過渡期，希望在過渡期，大家互相忍讓下，問及係唔係再簽咗約，袁潔儀稱：「係!雖然遲咗四、五日，不過，簽約日期都係跟番個接洽日子，其實冇咩影響。」問到家寶今次墊支律師費，怕唔怕家寶會攞唔番，袁潔儀講：「咁希望新老闆又好、舊老闆又好，體會到佢係一個打工仔，希望畀番佢，墊支咗嘅可以袋番落袋，呢樣佢哋都識做㗎喇!」