告別公和丨張建聲記錄小店最後回憶 顏卓靈《狂舞派》做豆花妹留光影
蘋果日報 2020/09/16 17:13
九龍城公和張建聲狂舞派顏卓靈
有60年歷史的九龍城公和荳品廠，因不敵發展商收購，本月底將光榮結業。公和荳品廠1893年由廣東人駱公和創立，最先於廣東道開舖，1958年遷往深水埗，及至1960年公和再於九龍城開分店，90年代創辦人將公和兩店出售，深水埗店由蘇家接手，九龍城店由潘家接手經營至今。
不少名人明星如周潤發和前財爺曾俊華等都是九龍城公和的熟客，而憑網劇《反黑》招積角色上位的張建聲，日前更與攝製隊拍攝特輯送別公和。有讀者日前見到張建聲與一女主持在九龍城公和進行拍攝，二人在店內食豆花飲豆漿外，又跟老闆娘傾談和合照留念。《蘋果》致電張建聲，他指當日是拍攝網台節目《遺失·港味》，還說：「公和9月結業，好唔捨得，今次疫情令到好多食肆做唔住，好多童年回憶都冇咗，所以我哋去同老闆娘傾吓偈，將呢間小店記錄低。我以前讀書踢完波都會去幫襯，因為又平又飽肚，佢哋豆漿係用石磨，好有古早味，老闆娘話冇信心將來可以再喺第二度搵到舖位開返，我都覺好可惜。」
由顏卓靈和蔡瀚億主演的電影《狂舞派》便曾於九龍城公和取景，顏卓靈飾演的阿花，從小在父母經營的荳品店幫手，但她醉心跳舞，不甘做豆花妹，所以加入大學跳舞學會追夢。
顏卓靈接受《蘋果》電話訪問時談到當年在公和拍攝非常深刻：「好深刻，有幾個場口交待我喺舖面或者入咗去廚房位，見到晒啲機器，咁大個女飲荳漿食荳腐花，第一次咁深入見到製作過程喺呢度發生，就算未拍《狂舞派》都知道公和，同朋友去過食，感覺係一間好老字號嘅舖，裝修同環境好難忘，佢哋要結業係好可惜嘅，佢都屬於香港人回憶之一，有佢獨特嘅味道，好可惜呢啲老字號逐間逐間離我哋而去，希望可以喺佢哋結業前再去一次。我記得都拍咗一整日，跟住我同BabyJohn kiss都喺嗰度，好緊張咁，啲荳味伴住我哋拍攝，我又攞住啲腐乳跳舞，係好開心嘅。」
九龍城公和本月底光榮結業，張建聲日前專程拜訪老板娘（右），記錄小店最後光輝。
顏卓靈主演的電影《狂舞派》便曾於九龍城公和取景。（網上截圖）
周潤發和前財爺曾俊華等都是九龍城公和熟客。（資料圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！