大陸女星范冰冰因捲入「陰陽合同」嘅逃稅風波，目前行蹤成謎，唔少已接工作都大受影響，日前傳出連早已接拍嘅荷李活動作片《355》都決定將佢飛起，傳出由章子怡執二攤頂替范冰冰嘅所有戲份。

由Simon Kinberg執導嘅女特務動作片《355》，今年5月在康城影展上全力造勢，安排范冰冰同埋四位國際級影后計有彭妮露古絲（Penelope Cruz）、瑪麗安歌迪娜（Marion Cotillard）、謝茜嘉謝茜婷（Jessica Chastain），以及《黑豹》（Black Panther）女星雷碧達尼安高（Lupita Nyong'o）晒冷宣傳，范冰冰當時仲透露該片會於香港、英國取景。

不過馮小剛今年初開拍《手機2》再度觸動前央視主播崔永元神經，搞到佢大爆影視圈經常以陰陽合約嚟瞞稅，而呢部戲幕前嘅范冰冰同幕後嘅馮小剛都成為爆料目標，范冰冰傳俾稅局一度軟禁，搞到佢全部工作叫停，包括國際性嘅代言廣告合約。

據《Deadline》報道，《355》雖然於明年開鏡，但片商考慮到冰冰已經「失蹤」，認為易角嘅決定係確有必要，認為事件未得到解決前，將要作出一個艱難嘅決定。其實，中國華誼兄弟今年花2,000萬美元，即約1.37億人民幣取得《355》嘅發行權，就算范冰冰照計劃參演呢部戲，《355》恐怕都過唔到中國電影審查機關，令呢筆天文數字隨時凍過水！

精選娛聞，喺晒《娛果》
http://fb.com/appledailyent