時富金融（510）今日公佈有位新執董，就係大股東關百豪阿仔關廷軒（Jeffrey），佢27歲，月薪去到8.5萬蚊，未計花紅，年薪都已經過百萬!聽講佢係筍盤一名，未婚，睇佢facebook，放晒同系公司實惠嘅宣傳相，好似事業心重。

Jeffrey份履歷唔錯嘅，佢喺出產過唔少諾貝爾得獎者嘅美國名牌大學Johns Hopkins心理學畢業，主修行為金融學，同時係證券及投資學會會員，翻查資料佢亦係滬港青年會嘅會董，有少少政治背景咁。

佢喺專門投資綠色科技嘅私募基金工作過，家陣係時富集團（1049）企劃投資部董事。聽講，時富金融之前賣盤賣唔成，關百豪把心一橫，叫阿仔入公司大搞而家最流行嘅Fintech，反正阿仔後生，用佢嗰套可能有得搞。

掌握財經生活資訊，即Like「蘋果ATM」fb專頁啦！
http://fb.com/appledailyatm