前利物浦隊長列納喺上個禮拜英超聯替熱刺射入加盟後首個聯賽入球，成為球隊贏波功臣。領隊荷杜賽後就大讚呢位靚仔中場，重話列納等於係佢哋嘅「碧咸」咁話喎，聽到佢咁講，就令我求大俠諗番起九八世界盃。
當時英格蘭嘅領隊就係荷杜，嗰陣碧咸喺英超聯已經開始鋒芒畢露，但荷杜就有鋪癮，就係鍾意用佢球員時期效力過嘅熱刺啲球員，所以碧咸就算踢得點好，個正選位始終爭唔贏安達頓。
到咗今日，荷杜竟然用佢當年睇唔起嘅碧咸嚟做讚賞列納，係就係馬後炮嘞，不過好穩陣噃。不過咁，佢嚟到熱刺後能夠令費迪南、安達頓、列納呢啲被傷病困擾職業生涯嘅球員獲得重生，都值得一讚嘅！

「波神」改名「蘋果波神」
嗰日我求大俠睇見一個廣告話有本叫《波神馬經》嘅波、馬刊物快將推出，嚇到我以為波神「老兼」，拿拿臨問佢，點知佢好㷫咁話係有人用咗佢嗰名，重話今屆表現失準，唔知係咪咁嘅關係。為咗唔想令人誤會，佢決定改叫「蘋果波神」，一於改名轉運。