第13屆大阪亞洲電影節舉行得如火如荼，15套入圍電影中佔三部港片包括杜汶澤自導自演嘅《空手道》，趙崇基執導、以六七暴動為背景發展到19年社會運動為題材嘅《中英街1號》，仲有譚惠貞執導由劉嘉玲夥拍吳肇軒嘅《以青春的名義》，頒獎典禮在當地今日黃昏時間進行。

趙崇基拉隊率《中英街1號》演員游學修、廖子妤及盧鎮業到大阪見影迷，眾人在院內同日本影迷交流，不過當趙崇基談到呢套戲能否在港上映時，佢即一時感觸落淚，佢話：「八年時間，付出多年嘅心血，面對重重壓力，又聽過好多叫我放棄嘅聲音，今日終於能喺大銀幕上睇到自己嘅作品，而且喺大阪亞洲電影節舉行世界首映。觀眾反應很好，好投入，提問嘅問題都好有水準。自己一直觀看，眼淚已流出來，上台後又忍唔住再流淚。」廖子妤都不禁眼濕濕。

講到趙崇基忍唔住落淚，佢就回覆話：「八年抗戰，開始以為出到本書就好開心，後來以為拍得到就好開心，再後來以為拍得完就好開心，最後以為有地方上映就開心了，想不到一部最本土電影，世界首映不在香港，卻在日本，也想不到日本觀眾反應如此熱烈，不少人看得感動流淚，於是一上台，我也忍不住哭出來了。接下來還有其他電影節首映。」

至於吳肇軒都首度踏足大阪電影節，出道作《哪一天我們會飛》雖有份參展，但當時佢仲係學生未能到大阪出席盛會，今次佢就重談拍《以青春的名義》床戲時搞到手指骨折一事。昨晚，大阪電影節舉行香港之夜，吳肇軒、游學修、廖子妤及杜汶澤等都有齊齊現身，而杜汶澤會獲電影節大會頒贈「亞洲明星大獎」(Asia Star Award)，今日在頒獎禮上接受殊榮。

精選娛聞，喺晒《娛果》
http://fb.com/appledailyent