郭偉亮（Eric Kwok）同老婆葉佩雯今日喺灣仔為ViuTV節目《飯聚現場》錄影，呢集預計喺佢哋11月23日嘅結婚6周年紀念時播出，所以Eric特別搵師傅學咗兩日，為老婆親煮炸臭豆腐、納豆燉蛋同梳乎厘，葉佩雯話：「我淨係知佢叫我嚟食飯，但我唔知係佢煮，真係好驚喜，我食完，佢即刻落閘話今次係最後一次。」Eric笑指對住發過酵嘅豆腐聞到想嘔：「雖然辛苦，但係值得。」葉佩雯好感動咁話：「我會記一世，在心中。」

問到Eric平時會唔會下廚？葉佩雯表示：「我就成日煮，佢負責洗碗，我好享受睇佢攞住海綿捽碟，好浪漫。」對於今年結婚6周年紀念，葉佩雯透露可能會出埠慶祝，佢又指屋企嘅狗狗生病，心情變得好沉重，經常去外地工作嘅Eric就以「世界級」嘅國語拍片o氹佢開心！