當年今日
關於我們

本地副練馬師勝在聽話

蘋果日報 2017/05/03 13:30

練馬師胡森阿Joe副練馬師

上季尾被馬會撤銷練馬師牌照嘅胡森,近日入稟高等法院告馬會,追究當年被馬會勸說搬入設施欠完善嘅奧運馬房,旗下馬受到附近工程噪音影響,直接令佢練馬成績下滑。胡森認為馬會涉及失實陳述同違約,要求馬會賠償同撤銷拒發牌照嘅決定。
以前夏志信、黃偉烈同張定邦等等練馬師,都因為成績唔達標被拒發牌照,胡森係第一個夠膽挑戰馬會嘅練馬師,都算勇氣可嘉,話晒馬會財力雄厚,萬一胡森打輸官司,損失將會更大。胡森喺女皇盃舉行前夕入稟,唔知係有心定無意,趁機向馬會示威宣洩不滿。
究竟有冇受薪董事或馬會管理層,曾私下向胡森作出一啲保證,令佢覺得馬會涉及失實陳述?呢個只有當事人先清楚。不過,今次事件馬會亦應該檢討吓,搵人私下講掂數呢套今時今日已經行唔通,跟足規矩做就最均真。胡森嘅申訴未必冇道理,但佢亦確係累積三季成績唔達標,邊個啱定錯留返法庭裁決,普羅馬迷不妨做吓花生友。
或者外籍練馬師比較重視維護自身權益同名譽,要佢哋返祖家重新起步亦較為艱難,胡森同孫達志冇牌,馬會都要搞一輪跟手尾,唔似過去被拒發牌嘅華籍練馬師咁順攤。其實馬會日後有練馬師空缺,都唔使太睇重練馬師國籍呢個因素,可以畀多啲機會本地副練,起碼必定符合馬會想人聽聽話話嘅要求。
阿Joe