有「金融沙皇」之稱嘅金管局前總裁任志剛前晚同任太拍拖逛書局，任太睇得相當入神，任總就喺書局周圍騰，最後仲催老婆走人，證明金融沙皇都係普通男人，雖然會跟老婆行街濕平，但冇乜興趣嘅話都會叫走人。
華華前晚7點左右喺灣仔一間老牌書局碰見任總，起初見佢一支公周圍行，唔知係咪冇戴招牌金絲眼鏡睇唔清楚，還是嗰層全部係中文書，引唔起任總興趣，任總雖然差唔多行勻全場，但拎上手嘅書，最多只係揭幾揭就放番低。過咗一陣佢就走埋任太身旁，任太喺賣特價書嘅一角好似書蟲上身，睇得非常入神，完全冇意欲離開。任總企喺老婆旁邊等咗大約5分鐘，最終忍唔住講咗句「好喇，行喇」，任太先至識做走人。
記得任總2009年退休前接受傳媒訪問時，承認自己年輕時冇耐性，從行動、言語表現晒出嚟，叫傳媒多多包涵。所謂3歲定80，冇耐性嘅任總始終都係冇乜耐性，不過，其實好多男人都冇興趣陪女友或老婆行街，任總嘅表現都係十分正常。

講開又講，任總平日去嘅地方都好平民，華華早前就喺觀塘一間專賣豉油嘅街坊舖頭「大孖醬料」，發現任總同老闆有一張「到此一遊」合照。呢度普通一支大樽生抽35元。聽夥計講，任太時不時會駕車去入貨，買番一兩支豉油返屋企煮餸，果真係賢妻呀。

李華華
mailto:[email protected]

熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24