香港，係全球唯一一個兩次獲選為世界三大夜景嘅城市，維港醉人景色當然係重點。美景配靚人，仲要係泳裝美女，再加埋危坐天台邊緣，大家又點睇？

早兩日喺網上流傳一條8秒長短片，片段一開始由酒店天台垂直下望，畏高者應該已經腳軟；隨後鏡頭向上移，只見有個性感泳裝女子，一頭長髮隨風飄逸，神情輕鬆寫意。不過原來兩腳輕擺，對落已經係相隔30幾層嘅地面，真係睇見都牙煙。

呢間位於天后威菲路道嘅Twenty One Whitfield酒店，客房坐擁維港景觀，雖然唔係對到正，但寬大嘅玻璃外望就係側眺銅鑼灣、灣仔同尖沙咀沿岸嘅城市景觀，據傳已經成為鄰近地區網絡紅人嘅熱門下榻酒店之一，拍片有維港做背景，一望而知嚟咗香港渡假啦。唔通呢位女子又係為呃Like？

今年年初就喺網上流出咗一批疑似從附近樓宇拍攝、據稱係該酒店客人未拉埋窗簾嘅房內活動情況，包括只着內衣褲走動、裸體自拍甚至貼近窗邊性交，春色無邊。片段流出後酒店報警，列作有犯罪或不誠實意圖使用電腦案，由東區警區刑事調查隊跟進，唔知而家查成點呢。

大家外遊都要記得，房間玻璃窗唔一定係單面反光㗎，無論有幾想喺壯麗景觀下解除束縛，要確保私隱，最好就拉番埋窗簾啦。

【網民點睇】
●Paul Chan：或者後面係泳池，游到攰時睇風景啫！
●芝士條：我估應該又係嗰啲直播博打賞...
●痴熊胴體：搏出位 做啲你估唔到佢想點嘅事
●花生男月頭：又係呢間酒店
●Joe Tsui：白痴中嘅白痴
●Bonnie So：巧高吖（驚）