高伯新馬房今晚（28日）出馬甚多，其中第3場四班1200米隻「勇者勝」上仗喺2檔起步，好快就到搶到內欄守到好位，結果輕勝同程，贏亞軍「加州勇將」1.5個馬位。

今場「勇者勝」繼續有運抽到1檔，再有條內欄幫手，但羅理雅話上場「勇者勝」贏馬過程較預期驚險，入直路時，佢以為內疊有空位，點知放頭嘅「首驫」力弱之際，突然閃入，令空位變成窄位，好彩炒飯哥及時推騎，「勇者勝」迅即竄上出頭，最終贏馬。

炒飯哥話如果當日慢半拍，冇當機立斷催策加速，隨時由贏變輸，今場排到內檔會慳到腳程，但入到直路都要打醒十二分精神，佢話對「勇者勝」充滿信心，指隻馬不斷進步，仍居四班好有惡氣喎。