由朴初瓏、尹普美、鄭恩地、孫娜恩、金南珠及吳夏榮組成嘅韓國女團A Pink，繼今年2月嘅見面會後，事隔半年6位成員再度襲港，喺亞博館舉行《2017 A pink Asia Tour [Pink UP] in Hong Kong》演唱會，而A Pink噚日已經抵港為港騷做準備。

不過今次亞博騷因安全檢查問題而延遲開場，直到晚上8時20分，演唱會終於正式開始，足足遲咗成80分鐘，但粉絲就冇鼓譟，仲耐心等候A Pink，6位成員身穿短裙晒腿、露腰亮相，又唱又跳以《Five》打頭陣，恩地更向粉絲揮手，至於等咗好耐嘅粉絲立即咆哮、尖叫，並高舉粉紅色螢光棒以示歡迎。

之後成員逐一用廣東話向粉絲打招呼，南珠更表示：「好掛住你哋」，隊長初瓏及後以韓文道歉：「遲咗開始真係好抱歉，多謝大家等我哋，都係為咗大家安全先遲開始，會盡力演出。」並指今年2月先見完港迷，但大家今次依然熱烈歡迎佢哋，大感高興。夏榮又感謝粉絲準備香港美食畀佢哋，食得好開心。

6位成員又表示好鍾意香港，初瓏之前仲與好友來港旅行：「首次孖朋友來港旅遊，食咗好多嘢食，好好好放鬆完返韓國。」，之後6位成員又以廣東話「我愛你哋」示愛粉絲，娜恩就晒英文介紹歌曲《Five》，再次引起粉絲尖叫。