農夫一連六場演唱會前晚尾場，撐場嘅藝人有吳業坤、連詩雅、蕭正楠、黃翠如等。尾場陸永太太同C君女友都有到場，陸永太太睇足六場，陸永講番噚晚放條片上網，佢拍低咗太太駕車被要求「吹波仔」酒精測試嘅片段分享，陸永話：「只是過路障，警方進行抽查，唔係超速，因太太第一次吹波仔，拍之前有問准警員。」

講到禁歌《港女收港男皮》，農夫爆響口話容祖兒來捧場，聽到有呢首歌就話「不如畀我唱吖！」演唱會期間，台下仲人叫Billy，陸永即刻嚇一嚇：「據我所知，知道呢個名嘅人已經死得七七八八，係我派人去暗殺佢哋。」之後陸永爆C君叫Steven，陸永話：「我個英文名係阿爸改，我要尊重佢，而我阿爸都叫Steven。」

今個月22日就34歲生日嘅C君，有一班粉絲同佢提早慶祝，佢哋台上切蛋糕，陸永話：「唔知過唔過到，希望佢過到啦！」觀眾叫陸永送吻，C君話:「我生日仲要咁懲罰我，唔好喇！」完騷後，農夫繼續開場玩迎賓，完場玩送客，佢哋喺出口位置逐一同離場觀眾握手。

農夫完場接受訪問，佢哋話好享受喺細場做騷，喜歡近距離俾人褻玩感覺，大場就留俾巨星，陸永話當擺酒，6場就已經有720圍，收足人情：「ok呀！所以咪握手送客囉。」佢哋話今次個騷名叫「等錢駛」，下次繼續以弱者姿態開騷呃大家，叫「冇budget，仲可以搵埋Do姐一齊開騷，不過要開早場：「6至10，完騷佢仲可以返電台開咪。」講到祖兒對禁歌《港女收港男皮》有意思？農夫話：「佢咁講過囉，仲send埋歌詞畀佢，佢覆咗我「收到」到o依家都冇喇！」

更多娛聞，喺晒《娛果》
http://fb.com/appledailyent