溫家寶呢次膽拖副總理李克強,高調掌管未來能源政策,預料會有大動作去統戰全國能源發展,投資者要非常留意,風向到底有冇轉變。未等到總理出手,我哋梗要兩手準備,將板塊內優質股寫好記住,見邊個板塊開始異動,往往就係利好政策出場之時。
新能源不外乎係核電、風電同太陽能呢3瓣。核電發展目標係到2020年將核電裝機容量提升至8000萬千瓦,佔總用電量7%,投資規模9000億元人民幣,未來5年要建9至10座新核電站。核電股概念早前有分析過嘅中核國際(2302)同有中廣核撐腰嘅銀建國際(171)。風電發展都拍得住核電,預計去年新裝機容量已有1000萬千瓦,代表作有龍源電力(916)。太陽能政策仍較為搖擺不定,炒味較濃。
搞乜電都好,總要有中國高精密(591)嘅電錶,亦唔少得上海電氣(2727)、哈爾濱動力(1133)、東方電氣(1072)等設備股。以上並非推介,只係幫大家分類,唔好再問邊隻買唔買得。
胡孟青