顏子菲、薛世恒、黃穎君等今日喺尖沙嘴出席微電影活動，有份主演微電影《最後機會》嘅顏子菲同薛世恒，喺片中飾演同學，薛世恒話：「我飾演一個生命已經結束嘅人，但上天畀我一個機會去改變一件事，情緒戲都幾多，不過我以前做生意，好少將情緒放喺面上。」顏子菲就話：「最好玩同最辛苦就係喊，由開工喊到收工，差唔多拍完，我開心到跳起。」

至於擔任另一部微電影《8%》編劇嘅黃穎君，佢希望以殘疾人士作藍本，以正面故事帶出每個人都要自強不息。講到佢噚日生日，不過就同老公嗌交，「老公為我安排咗好多嘢，但我就接咗工作，估唔到會嗌交，佢花咗好多心思，book咗一間好難book嘅餐廳，但最後食唔到，我要o氹番老公，不過我努力做嘢搵多啲錢，老公都要體諒我。」

精選娛聞，喺晒《娛果》
http://fb.com/appledailyent