日本國民級組合SMAP鬧不和決定年底解散收場，五子已先後開腔向歌迷及外界交代，工藤靜香日前同老公木村拓哉結束夏威夷之行返日，對於老公被指反骨，兼且係令SMAP分裂嘅元兇，靜香挺身護夫講好說話：「事情並非如大家想像，我對於他工作上的事不會多說，所以不太清楚。」日前有報道指靜香曾打電話痛罵SMAP前經理人飯島三智，過去更有傳媒報導指靜香勸木村留在尊尼事務所導致SMAP不和，今次靜香總算是為自己澄清。

噚日，靜香現身國立新美術館嘅「第101屆二科展」，今次已係佢連續20屆入圍，雖然靜香對SMAP解散嘅事封口 ，但佢自言本來今年初冇繪畫心情，仲曾考慮唔參加二科展，似乎係受老公是非影響心情，不過到夏天，靜香想法一轉，花兩個月完成了兩幅以藍色為主調作品，帶出喜樂以及哀傷嘅內心表現，明顯係借繪畫來反映自己心情。