佳士得拍賣行今年首場名釀拍賣會又殺到嚟，下月3日一連兩日舉行。今次共拍賣572件拍品，估計總值逾4,600萬元。全場最貴嘅拍品係首日拍賣嘅拉斐莊（Cha^teauLafiteRothschild）25年垂直珍藏系列，估價最高達450萬元，賣家仲係本地收藏家。

「要花好多年先搵得齊」

八方收到料後，即刻打畀佳士得公關Gillian八吓係邊個收藏家割愛，會唔會係好酒嘅唐司長？點知Gillian好口密，只係話收集呢批酒一定要好有耐性，因此呢個收藏家一定好鍾意酒喎。
Gillian解釋話，呢個垂直珍藏系列共25箱酒，每箱12瓶，年份由1981至2005年共四分一世紀，即係每年一箱，「香港呢個收藏家要搵齊連續25年出產嘅Lafite，真係唔簡單，要花好多年先搵得齊」。Gillian話，呢25箱Lafite至今仍保持喺原裝木箱，自購入以來一直擺在專業酒窖，相信品質冇得彈。同日另一焦點係五瓶來源顯赫可靠嘅1947年柏翠莊，估價35萬元。
翌日拍賣同樣由波爾多名釀揭開序幕，同場仲有勃根地佳釀，從Raveneau到Rousseau，甚至係Leroy都一應俱全。當中最值得一提嘅，係一批為數甚豐嘅羅曼尼．康帝（DomainedelaRomanée-Conti）系列，其中原裝木箱1988年羅曼尼．康帝，合共12瓶，估值達80萬元。

投得香檳可同明星午宴

Gillian話，當日有場慈善香檳拍賣，係六瓶直接從酩悅酒莊（MoetetChandonwinery）運嚟嘅1911年珍罕香檳。呢六瓶珍釀最矜貴之處，係連同一個特製嘅LV皮箱作收藏，估值50萬元。成功競拍者，可請五位賓客喺9月6日同Moet明星代言人ScarlettJohansson，出席由Moet酒莊總裁DanielLalonde等高層主持嘅私人午宴，「近年拍賣佳釀都有一個趨勢，成功競投指定拍品，都可以食番一餐」。

mailto:[email protected]