古天樂前晚喺玫瑰新邨寓所開生日派對，容祖兒同男友劉浩龍（師兄）呢對戀人噚日7點幾執到好正現身跑馬地一間賣酒嘅舖頭揀酒送禮，師兄見到記者即刻通知祖兒，仲同記者Say hi，不過祖兒就冇乜反應，然後佢哋就雙雙飛車去古仔生日派對。

師兄避入鏡

古仔生日派對有古巨基、吳君如、黃偉文同埋買酒嘅小情侶容祖兒同劉浩龍，一班老友喺踏正12點，即刻喺fb直播古仔賀壽派對，等一班古粉可以一齊同偶像過45歲生日，眾人齊齊合唱生日歌，然後輪流祝福古仔，君如就大嗌心入面嗰句：「快啲娶老婆！」祖兒跟住接力話：「紅鸞星動！」古仔即刻好客氣話：「多謝多謝！」不過祖兒仍然意猶未盡，再祝古仔：「啲皮膚日日都咁……黑！」古仔即刻藐嘴扮嬲，祖兒乘勢攬住古仔呵番。最後古仔用君如口中嘅「小李膠刀」切生日蛋糕，再同基仔、君如、祖兒錫錫面珠，當古仔攬攬祖兒嘅時候，更識趣地叫師兄入鏡，不過師兄唔畀面，始終如一做一個祖兒背後嘅男人。
撰文：馮仁昭